為咗逃離日復一日嘅沉悶，我哋總期待下一次旅行、期待親眼見證北極光或壯麗嘅金字塔，重新震撼乾涸嘅靈魂。
《Awe: The New Science of Everyday Wonder and How It Can Transform Your Life》一書嘅研究卻打破呢個迷思。心理學教授 Jennifer Stellar 曾要求參與者記錄生活中所有「Awe（敬畏與震撼）」，結果發現，收集得最多震撼時刻嘅參與者，佢嘅日誌最常出現嘅畫面居然係每朝「將牛奶倒入咖啡」嘅一刻，並非奢侈美景。
原來，每日經歷幾分鐘「微小震撼」，有效減輕焦慮、壓力甚至孤獨感。呢種現象源於「微小自我（Small Self）」效應——當我哋沉醉喺美好事物中，腦海入面嗰個挑剔又焦慮嘅「自我」會暫時安靜。當注意力唔再受困於眼前瑣碎，就可以重新與世界連結。
除咗大自然，當目睹他人展現善良同勇氣，例如陌生人喺雨中撐傘、朋友不計回報陪伴，或者身處困境卻保持尊嚴嘅人，都能讓人再次相信純粹嘅善意。
聽日開始，不妨喺返工途中畀自己一場 Awe Walk。暫時放低腦海入面嘅 To-Do List，試試用第一日嚟到全新環境嘅目光觀察四周，尋找令你發出「嘩」聲嘅細節，適時畀自己震撼一下，療癒大腦！
Save 低呢篇 Awe Moment 靈感，分享畀身邊嘅朋友，一齊搵返治癒精神內耗嘅力量啦！
