世界關節炎日|膝痛、腰痛,愈休息會愈好?

肌力保持住,日常生活就更有保障:繼續自己去街市、上落樓梯、陪屋企人去公園,或者旅行時行到多一段路。今個世界關節炎日,與其等痛楚消失先郁,不如由今日行多一步開始?

膝頭痛,好多人第一個反應係「唞多幾日先」。休息本身冇錯,但如果因為怕痛而長期郁少咗,關節反而會愈嚟愈僵硬。

衞生署《人口健康調查2020–22》顯示,全港15歲或以上人士之中,8.4% 曾經由醫生確診肌肉骨骼疾病,當中包括關節炎、退化性關節炎或風濕病(佔15歲或以上人士3.6%),以及慢性腰背痛(1.8%)。比例隨年齡上升,85歲或以上人士更達25.4%。而呢啲只係確診數字,未計膝痛、腰痛但冇睇醫生嘅人。

點解郁少咗會令情況變差?醫管局智友站解釋,缺乏活動會令肌腱同關節失去柔韌性、力量同耐力,活動時更痛,形成惡性循環,所以應該「盡早恢復活動」。啱啱恢復活動時,痛楚可能會短暫加劇,但感到痛楚未必代表身體受到損害。

國際指引亦支持呢個方向。英國國家健康與照顧卓越研究院(NICE)將治療性運動,例如肌力訓練同帶氧運動,列為退化性關節炎嘅核心治療;世界衞生組織(WHO)亦將結構化運動,即係按個人情況編排好類型、強度同次數嘅運動計劃,列為慢性腰背痛可考慮嘅非手術治療。

香港研究都有類似發現。2026年《Clinical Rheumatology》一項研究回顧咗2,243名輪候換膝手術嘅末期膝骨關節炎患者。佢哋參加由物理治療師帶領、包括帶氧、阻力同神經肌肉訓練嘅運動計劃後,平均痛楚評分(0–10分)由5.60降至4.68,日常功能同體能亦有改善;功能最差嗰組,部分改善更維持到18個月。

末期患者都做得到,一般長者亦可以按能力開始。衞生署建議長者每星期最少2日做肌力訓練,可以用自身體重、健身器械、啞鈴或阻力帶,由較輕負荷開始,按能力逐步增加。如果未習慣運動,可以先由步行、健身單車、太極或水中運動入手;有需要嘅話,先由醫生或物理治療師評估,再慢慢加強。

肌力保持住,日常生活就更有保障:繼續自己去街市、上落樓梯、陪屋企人去公園,或者旅行時行到多一段路。今個世界關節炎日,與其等痛楚消失先郁,不如由今日行多一步開始?

(註:以上內容僅供健康參考,如有任何疑問,請諮詢專業醫生意見。)